又是一篇遲來的文章…

 

曼谷之旅已完成了三星期，可惜回來後不斷加班、keep住返工，就連行李箱也是回港一星期後才真正執拾 (當然衣服一早已清洗啦~~~)，忙得不可交關又怎有精力再寫blog呢… (其實… … ，一字記之曰 – 懶)。

 

今年唔知做乜，旅行特別多。二月尾才去完台灣，原計劃六月尾到訪日本 (後因日圓上升，已改到上海)，怎料中途再插了一個曼谷，真係飛得密過空姐！其實本身對泰國的印象一般，或許是上一次到訪著實趕忙，趕到好似無去過一樣，再加上小公主唔食辣… …。不過這個突發旅行團也造就了我和另外兩位好友amy和ivy的十年之約，我地三個講左好耐話要一齊去旅行的約定，終於可以實行，加上泰國通bowie，真係唔去唔得。以下是少少節錄：

 

今次選搭下午機，不用太早起床。在巴士站看著姍姍來遲的ivy拖著細旅行喼趕來，令我和bowie的大喼顯得誇張，不過大家都打賭購物狂ivy要買紅白藍回港…。

 

到達酒店check in，因房間分配問題，我們被upgrade了，很lucky。房間很大，還有一個小小的茶水間，很像家。放低行李馬上兌款，無意發現了一檔勁好味串燒，真是不用任何醬汁已很好吃，每人各自幹掉兩串。跟住直闖food court，泰國的food court不同香港，環境很美，食物勁有水準，小公主未食過一個如此好吃的凱撒沙律和焦糖布甸，還有歌手伴唱… … 可惜不能拍照，否則一定記低這個動人時刻。

 

第二天出發到Sunday market ，陽光普照，熱到想死。如果唔係貨品價廉物美，我諗我一早放棄左。此乃旅客必到之地，廣東話周圍飛，差d唔記得自己身處曼谷，以為去左旺角。係Sunday market最好玩的地方，係講價，其實本身d野都已經平，但我地係都要同人為左個幾蚊港幣死講爛講，講到人地要問我地係邊度黎… … ，不過講價成功又真係好開心，好鬼有成功感。

 

第三日永遠出事。去到商場再次瘋狂購物，尤其是女性衣物，真係百買不厭。掃左一輪貨，齊齊執行李轉酒店。這次是一間四人房，好似去camp咁，大伙兒一間房，嘈爆！放低行李去左食野，暈左三日的我要迫自己食野先叫好番d。食完野又再買過，見到美味手信買到收唔到手，剛兌換的泰銖差d又無晒。食完買完累到死，又去左按摩。之前兩晚個間的手勢麻麻，按極都鬆唔到，今次呢間之前幫襯過，質素有保證，按完即刻唔暈兼鬆晒！晚上china town dinner，媽媽話一定要食翅，結果太甜又唔係真係咁好味，不過其實食物真的很不錯，大家食到抱住個肚走。原本打算返到酒店附近再挑戰美味蛋糕，不過café提早關門，一怒之下同honey掃街邊貨，其中一檔買電影tee，好靚，我同honey就係個檔左揀右揀，結果一攪就成個鐘… …。

 

第四日起唔到身，一醒已經唔見左darling同bowie，勁驚！會合後去左一間bug & bee 的café，裝修很美，我同honey又喪影相，點知遇到一個比我地更愛影相的可愛女侍應，佢可以拎住我地部相機不停找美麗新角度。這兒的食物很有水準，他們的芝士白汁豬排飯我到而家都仲懷念梗… …。食飽飽，下一站ocean world！它是全亞洲最大的水族館，除左海洋生物外，它們在魚缸內的佈置也十分漂亮，實在值得學習。晚上再行夜市，好多design野，最衰驚唔夠錢，如果唔係應該會買多個夜市返香港。

 

最後一天，早早起床食完早餐再作最後衝刺。call左第一天接我地嘅的士司機車我地去機場，在車上大家齊齊學泰文，勁開心。原本打算在機場再食一餐好的，怎料時間不足，加上新機場太大，鋪頭七零八落，結果草草食左d野就上機，真係有少少敗筆，下次要再預多d時間先得！

 

今次去曼谷印象好多了，起碼有興趣再去。現在先期待數日後的上海之旅，再計劃明年的旅行大計… …。唔知幾時我同darling & honey會再去旅行呢？

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

呢排好懶寫blog，六月份好似俾工作侵佔咗，同一時間要兼顧兩份工真係會顛，所以個腦係可以嘅情況底下都想俾佢空白一下。

「香港回歸十周年」!!! !!! !!! !!!

又十年。

九七年回歸個日，我到而家都仲記得。

個年小公主第一次正式出城工作，公司為慶祝回歸，命令所有藝人晨早stand by門口，準備舞龍舞獅做大個勢。小公主等同袍亦因時間太早關係，之前一晚所有人都係公司過夜，點知個晚已經掛左紅色暴雨警告。

第二日一早起身，天氣更差，收音機好像說過會掛黑雨。化好妝換好衫，浩浩蕩蕩去到門口，只見老細企晒係度，功夫師傅跳舞女郎企埋左一邊，除左公司人之外一個客都無。d風雨就係前面打橫咁過，好似電影個d沙漠畫面。身為藝人老細又係度，絕不可能企係度，結果八個小丑就不停同自己玩，好似瘋人院個d病人一樣。好不容易等到一架旅遊巴到達，眾人一擁而上，心諗點都有幾個小朋友同我地玩下，點知成架車得一個小朋友，畫面即時變左八個小丑圍攻一個小朋友，勁恐怖。

轉眼又過左十年，呢一日都係要工作，地點唔同左，去左深圳灣大橋做開幕。呢個係小公主離開呢間公司前嘅最後一個節目，導演咁橋又係我第一次效力本台時嘅導演，感覺好完整。我地負責嘅部份只係橋面個幾分鐘，但係就用左成個月去籌備、開會、recee，不過能夠率先站在一條未開放的石屎路上面，其實都幾興奮。

玄學有個叫做行十年大運，各樣野都會走回十年前一樣。十年前後小公主都係沾得一身濕，剛巧這次又重返十年前的工作地方… …，睇黎係時候諗下曾經有咩好事發生過，計定條數都差唔多。

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

眼見APA蛋糕聖手得閒無事就整下蛋糕麵包，攪到小公主都心癢癢。雖然小公主間中都會煮下飯仔( 間中意思者，一年數次也！)，但對上個次用個焗爐整甜品應該發生係中學家政堂嘅時候，生疏之餘更可說是亳無經驗，唯有睇書學整餅。

 

懶得抄番十年前買的甜品書，把心一橫逛落書店，眼見一本《超簡單。零失敗》的甜品書，有小公主最愛的布甸，又有大路曲奇蛋糕製法，二話不說馬上付款。返到屋企諗深一層先知錯，如果佢講到咁簡單我都做唔到，拆佢招牌之餘自己都應該要封爐，廚房也許成為小公主的禁地... ... ，突然大壓力。

 

母后甚少整西式糕點，架撐唔多，小公主唯有揸住本書續樣買。多得海記之前俾的Jasco現金券，小公主買得安心又放心。一大袋用具加埋幾年前係十蚊店買的用品( 幾年前已打算焗蛋糕，無奈d用具到而家都仲係個膠袋入面... ... )，設備齊全，只差買材料一環。

 

當然，買材料都要好大決心，因為買得就一定要整。下定決心走入超市，跟住本甜品書買麵粉、發粉、朱古力... ...，買買下先知小公主對呢d材料好陌生，發粉係咩呢？無香油可唔可以唔用？朱古力係咪我地平時食開個d呢？幸好得蛋糕聖手接聽電話，解決左小公主唔少問題。

 

返到屋企開壇作法，牛油砂糖麵粉攪左小公主成個鐘，手軟之餘後尾先記得無落發粉，死都拗番生的小公主當然唔會俾佢衰，點都落少少起碼對得住自己良心。麵團太大焗爐太小，結果四款口味分開焗左起碼六盤，感覺有點像麵包店趕出爐。曲奇一大堆，小公主戰戰兢兢試一口，新鮮出爐味道也不差。袋左兩袋出去送俾朋友，反應良好大家仲諗梗可唔可以俾我寄賣曲奇。有咁好反應小公主始料未及之餘，原來都好開心同滿足！

 

等小公主得閒再鑽研下其他曲奇口味，或者可以創出條新血路。